Anasar - Gujarati eBook

માણસને વળગતા બધા જ રોગોમાંથી એક રક્તપિત્ત જ એવો રોગ છે, જેમાં દર્દી કરુણા અને સેવાનું પાત્ર બનવાને બદલે ધિક્કાર અને ધૃણાનું પાત્ર બને છે. ખુદ સ્વજનો ચાકરી કરવાને બદલે ફાટી ગયેલા વસ્ત્રની જેમ દર્દીને ફેંકી દે છે. આ નવલકથા દરેક વાચકને એ દર્દીઓનાં મનોજગતમાં ડોકિયું કરાવે છે. રક્તપિત્ત જેવા રોગને લીધે ઉઠતા જખમમાંથી વહેતા પરુ અને લોહી સાથે માનવીય સંબંધો પણ શું વહી જતા હશે? આવા દર્દીને શરીર કરતાં મન પર જે ઊંડા ઘા પડે છે જેને ક્યારેય રુઝ આવતી નથી, એના જીવતા પુરાવા આ નવલકથામાં જોવા મળે છે. જિજીવિષાની એક સૂક્ષ્મ દોરીથી બંધાઈને આવેલા આ દર્દીઓ - માત્ર દર્દીઓ જ નહીં, એ સૌ પહેલાં તો `માણસ' છે એ સત્યને લેખિકાએ અહીં રૂપાના પાત્ર દ્વારા ઉજાગર કરી આપણને સૌને વિચારતા કરી મૂક્યા છે. લોહીના ટીપાંનોય સંબંધ નથી એવા કેટકેટલા સેવાભાવી લોકો પોતાની જિંદગીની પરવા કર્યા વિના સેવાયજ્ઞમાં પોતાના પળપળના શ્વાસની આહુતિ આપી રહ્યાં છે... આ જોઈને તમનેય સવાલ થશે કે સંસારમાં કયો સંબંધ સાચો? પ્રેમનો કે લોહીનો? માનવીય સંબંધની ગાથા ગાતી નવલકથા એટલે જ અણસાર!